Bulajalah ku Torempak
Laoiknya dalam umbak monimpa
Simak pungaja ibu dan bapak
Siang malam jangan lah lupo
Koloulah poi nak ku soborang
Baju lobil nak bulanak boli
Kain panjang nak boli dolu
Kolou poi lah nak korong urang
Ibu cari do sanak cari
Induk somang nak cari dolu
Batang aro batang bubaoik
Aro maek ditobang-tobang
Godang sulero jangan puturuik
Sulero mumuek badan tubuang
Urang godong ku kampong lamu
Bumain rakik lah kolom
Urang kampong mari busamu
Mumbangkikkan toreh non torondam
Sokitu lah timang dori kami
Lobieh dan kurang tolong maafkan
Itulah pintak pominto diri
Budayo kito jangan tingakan
Lirik V
Guguo unak ditimpo alu
Tolang kuniang murobah muda
Tiduo anak tiduo lah dolu
Sapu koniang pojomkan mato
Dijaja baru dikirai
Ijuk jangan dirontang lai
Diaja badan murosai
Isuk jangan tugamang lai
Sungai Rapek titian rambong
Sangkudoik jangki ku soborang
Kolou munapek janganlah sombong
Murah awak dibonci urang
Ulak bandong sampannyo borek
Pisang sobieh digali jangan
Sombong usah dibuek
Cakap bolobieh sukali jangan
Batang delok batang piutah
Dikorek-korek dibuek titi
Elok-elok kaki mulangkah
Jorek sorupo dengan jurami
Buah polom di hutan jirat
Guguo subuah masak mongka
Olah kolom dunia akhirat
Di situ baru badan munyosa
Padi bunamo lompok tangkai
Poisi kopuk di tongah ruang
Ilmu nan elok tolonglah pakai
Purangai buruk copek dibuang
Kau si delok mati togak
Amiek supangku paga laman
Mumuek elok nak diagak-agak
Mumuek buruk sukali jangan
Pasie Matan di Tanjung Bolik
Mulageh di Sungai Kumpai
Padu bujalan mumolik-molik
Elok muminteh mak copek sampai
Batang pimpiang batang dadalu
Amiek subatang kan tiang tuo
Sokitu timang kito dolu
Bekou baru disambung pulo
Lirik VI
Paneh gego munyomuo pinang
Pinang dijomuo ku tongah ari
Soneh ebo baok butimang
Mungonang untong badang diri
Padi mudo di topi panguh
Topi bubateh busorongkan
Ati eba nak mumao jauh
Ati nan goteh ponorongkan
Alu sonik batang turontang
Buek punumuk lado mudo
Dolu sonik kinin lah godang
Olah godang pungaja tibo
Batang pinang batang kopidi
Amiek subatang kan laeh atok
Urang butimang busunang ati
Kami butimang kan ganti ratok
Usah tu bio-bio padi
Samo buladang kito baru
Usah tu ebo-ebo ati
Samo anak dagang kito baru
Kolou panai muangin padi
Tali godia dilopeh jangan
Kolou panai bumain budi
Burong non lia makan kutangan
Ukan galah kayu tupangong
Loso di utan panjang bukelok
Ukan di utan ti salah ibu mungandong
Pinta di badan non tido elok
